काठमाडौं स्थित बबरमहलको पहिले अख्तियार दुरुपयोग अनुसन्धान आयोग रहेको भवनमा आफ्नो कार्यालय खडा गरी क्रियाशिल रहेको यस समितिले आफ्ना सदस्यहरुको विभिन्न टोलीहरु गठन गरी उजुरी, गुनासा तथा सूचनाहरुको आधारमा देशभरिका सम्बन्धित ठाउँहरुमा स्थलगत भ्रमण गरेर सत्यतथ्य छानवीन गरी समय समयमा प्रतिवेदन दिने एवं आचारसंहिताको पालनाका लागि सम्बन्धित पक्षलाई दवाव दिने कार्य गर्नेछ ।


२. उद्देश्यहरु
नेपाल सरकार र नेकपा माओवादी बीच २०६३ असार १ गते कुपण्डोलमा सम्पन्न दोश्रो चरणको वार्तामा यस समितिको गठन गर्न भएको सहमतिको बुँदामा "सात राजनैतिक दल र नेकपा    -माओवादी) बीच भएको १२ बुँदे समझदारी र नेपाल सरकार र नेकपा -माओवादी) बीच मिति २०६३/२/१२ मा भएको         युद्धविराम आचारसंहिताको कार्यान्वयनको अनुगमन गर्न  . . . " भन्ने वाक्यांश उल्लेख भएकाले यसैलाई समितिको प्रमुख उद्देश्य मान्नुपर्ने हुन्छ । यसको अतिरिक्त समितिको कार्यक्षेत्र समेतलाई दृष्टिगत गर्दा यसका उद्देश्यहरु देहाय बमोजिम रहेका छन् ।
   १. आचारसंहिता एवं विभिन्न सहमतिहरुमा उल्लेखित विषयहरुको पालना भए नभएको बारे अनुसन्धान तथा अनुगमन गरी दुवै पक्षलाई सुझाव दिनु एवं पालना गर्न लगाउनु ।
   २. कुनै पक्षबाट आचारसंहिताको उल्लंघन भएको पाइए वा त्यसो भएको भन्ने कुनै उजुरी, सूचना वा  जानकारी प्राप्त भएमा छानवीन र अनुसन्धान गरी सहमतिमा  समस्याको समाधान गर्ने प्रयास गर्नु ।
   ३. अनुसन्धान, छानवीन र सहमतिको आधारमा समाधान वा सुझाव सम्बन्धी प्रतिवेदन दुवै पक्षका प्रतिनिधिहरु
रहेको संयुक्त समिति समक्ष पेश गर्नु ।